Sedert die Universiteit se nederige ontstaan in 1908 het die instansie reeds ver gevorder in die nastrewing van hierdie doelstelling en word UP tans gereken as een van die toonaangewende hoëronderwysinstansies in die land.

Om verder sy posisie te versterk en om sukses in die toekoms te verseker, het UP ‘n navorsingsagenda ontwikkel wat op vier bene berus:
Navorsing sal ‘n positiewe bydrae lewer om in plaaslike, nasionale en internasionale behoeftes te voorsien en sal ook in lyn wees met die Nasionale Navorsings- en Ontwikkelingstrategie en internasionale tendense;
Navorsing sal op die bewese kapasiteit wat binne die Universiteit bestaan, gegrond wees en sal voortbou op die werk van uitstaande navorsers en -leiers;
Navorsingstemas sal nie gedefinieer word in terme van korttermynbehoeftes nie, maar sal toekomsgerig wees deur areas met potensiaal te identifiseer wat die Universiteit sal dwing om vaardigheid te bou om voortaan steeds die leier op die gebied van navorsing te bly; en
Die Universiteit se navorsingsagenda moet kennis neem van die besondere vaardighede wat reeds binne die Universiteit bestaan.
Navorsingondersteuning speel ‘n baie belangrike rol in die praktiese implementering van die Universiteit se navorsingsagenda. Die afdeling se belangrikste funksie is die lewering van ‘n reeks ondersteuningsdienste wat daarop gemik is om die ontwikkeling van navorsing te stimuleer deur aan diegene wat aktief betrokke is by navorsingsprojekte ondersteuning te bied.

Dienste word deur twee afdelings gelewer; naamlik Navorsingondersteuning en die Kontrakte- en Intellektuele Eiendomkantoor.